ဆိုက်ဘာရာဇဝတ်သားများကို ဘီလီယံနှင့်ချီ ငွေကြေးခဝါချခွင့်ပြုခဲ့ခြင်းနှင့်ပတ်သက်၍ KuCoin အား ငွေကြေးချဝါချမှုတိုက်ဖျက်ရေး ချိုးဖောက်မှုများဖြင့် အရေးယူ

          ​အမေရိကန် တရားရေးဌာနသည် ကမ္ဘာ့ခရစ်တိုငွေကြေးလဲလှယ်ရာ KuCoin အိတ်ချိန်းနှင့် အိတ်ချိန်းတည်ထောင်သူနှစ်ဦးကို ဆိုက်ဘာရာဇဝတ်ကျူးလွန်သူများအား ငွေကြေးခဝါချရန် ပလက်ဖောင်းကို အသုံးပြုခွင့်ပေးခဲ့ပြီး ငွေကြေးခဝါချမှုတိုက်ဖျက်ရေး သတ်မှတ်ချက်များကို လိုက်နာရန်ပျက်ကွက်မှုဖြင့် တရားစွဲဆိုထားသည်။

          ၂၀၁၇ ခုနှစ်တွင် တရုတ်နိုင်ငံသား Chun Gan နှင့် Ke Tang တို့က တည်ထောင်ခဲ့သော KuCoin သည် ဒစ်ဂျစ်တယ်ငွေကြေးမျိုးစုံအား ဝယ်ယူရန်၊ ရောင်းချရန်၊ ဝယ်ရောင်းရန်နှင့် သိမ်းဆည်းရန်အတွက် ကမ္ဘာ့အကြီးဆုံးသော ခရစ်တိုငွေကြေးလဲလှယ်ရာ ပလက်ဖောင်းအနက်မှ တစ်ခုဖြစ်သည်။ ပလက်ဖောင်းသည် ပုံမှန်စျေးကွက်ဝယ်ရောင်းပြုလုပ်ခြင်း (Spot Trading)၊ အနာဂတ်စျေးကွက်ဝယ်ရောင်းပြုလုပ်ခြင်း (Futures Trading)၊ ရင်းနှီးမြှုပ်နှံခြင်း (Staking)နှင့် ငွေချေးဝန်ဆောင်မှုများကိုလည်း ပံ့ပိုးပေးသည်။

          ယမန်နေ့က အများပြည်သူသို့ ချပြခဲ့သော စွဲချက်တစ်ခုတွင် KuCoin သည် အမေရိကန် ဥပဒေများနှင့် စည်းမျဉ်းများရှိ ငွေကြေးခဝါချမှုတိုက်ဖျက်ရေးတာဝန်များကို မလိုက်နာဘဲ အမေရိကန်ရှိ သုံးစွဲသူများကို ၎င်း၏ပလက်ဖောင်းပေါ်တွင် ရောင်းဝယ်ဖောက်ကားမှုပြုခြင်းအား သိသိနှင့် ခွင့်ပြုထားကြောင်း တရားရေးဌာနက အခိုင်အမာဆိုသည်။

          ဤတာဝန်ဝတ္တရားများတွင် “သင့်ဖောက်သည်ကို သိပါ” KYC စနစ် အကောင်အထည်ဖော်ခြင်း၊ ဖောက်သည်များ၏ အထောက်အထားကို စစ်ဆေးခြင်းနှင့် မသင်္ကာဖွယ်လုပ်ဆောင်ချက်များအတွက် အာဏာပိုင်များက နောက်ထပ်စစ်ဆေးနိုင်ရန် အစီရင်ခံစာတင်ခြင်းများ ပါဝင်သည်။

          KuCoin သည် စည်းမျဉ်းများကို မလိုက်နာခဲ့သည့်အပြင် ပလက်ဖောင်းအနေဖြင့် အမေရိကန်ရှိ သုံးစွဲသူများအတွက် အမေရိကန် ငွေကြေးခဝါချမှုတိုက်ဖျက်ရေးနှင့် KYC သတ်မှတ်ချက်များအား ကင်းလွတ်ခွင့်ရရှိစေနိုင်ရေး ဖုံးကွယ်ရန်လည်း ကြိုးစားခဲ့ကြောင်း တရားရေးဌာနမှ ပြောကြားခဲ့သည်။ ထို့ပြင် ၎င်းတို့မှ အမေရိကန်ရှိသုံးစွဲသူများအား ပလက်ဖောင်းကို အသုံးပြုရန် KYC မလိုအပ်ကြောင်း ကြော်ငြာခဲ့သည်။

          KuCoin ၏ လိုက်နာဆောင်ရွက်ချက် အားနည်းမှုကြောင့် ခြိမ်းခြောက်ငွေတောင်းခံသောဆော့ဖ်ဝဲလ်ဂိုဏ်းများ၊ မြေအောက်စျေးကွက်များ၏ အကျိုးအမြတ်များ၊ အဖျက်အမှောက်ဆော့ဖ်ဝဲလ် လည်ပတ်မှုများမှ ရန်ပုံငွေများနှင့် ငွေကြေးလိမ်လည်မှုများ အပါအဝင် သံသဖြစ်ဖွယ်ရင်းမြစ်များမှ အနည်းဆုံး ၉ ဘီလီယံရှိသော ခရစ်တိုအရွှေ့အပြောင်းများ ဖြစ်စေခဲ့ကြောင်း အမေရိကန်တရားရေးဌာန၏ ကြေညာချက်တွင် ပြောဆိုထားသည်။

          KuCoin သည် လိုအပ်သော ငွေကြေးခဝါချမှုတိုက်ဖျက်ရေးနှင့် KYC ပရိုဂရမ်များကို ထိန်းသိမ်းရန် တမင်ပျက်ကွက်ခြင်းကြောင့် မြေအောက်စျေးကွက်များနှင့် အဖျက်အမှောက်ဆော့ဖ်ဝဲလ်များ၊ ခြိမ်းခြောက်ငွေတောင်းခံသောဆော့ဖ်ဝဲလ်များနှင့် ငွေကြေးလိမ်လည်မှုများအပါအဝင် ရာဇဝတ်မှုမှ ရရှိသော ငွေကြေးမြောက်များစွာကို ခဝါချရန်အတွက် KuCoin အနေဖြင့် အသုံးချခြင်း ခံခဲ့ရကြောင်း တရားရေးဌာန၏ကြေညာချက်တွင် ရေးသားထားသည်။

          ၂၀၁၇ ခုနှစ်တွင် တည်ထောင်ပြီးကတည်းက KuCoin အနေဖြင့် ဒေါ်လာ ၅ ဘီလီယံကျော် ရရှိခဲ့ပြီး သံသယဖြစ်ဖွယ်ငွေကြေးနှင့် ရာဇဝတ်မှုများမှရရှိသောငွေကြေး ဒေါ်လာ ၄ ဘီလီယံကျော်ကို ပေးပို့ခဲ့သည်ဟု ဖော်ပြထားသည်။

          တည်ထောင်သူနှစ်ဦးသည် လိုင်စင်မဲ့ငွေလွှဲလုပ်ငန်းကို လုပ်ကိုင်ရန် ပူးပေါင်းကြံစည်မှုနှင့် ဘဏ်လုပ်ငန်းဆိုင်ရာလျှို့ဝှက်အက်ဥပဒေအား ဖောက်ဖျက်ရန် ပူးပေါင်းကြံစည်မှုတို့ဖြင့် စွဲချက်တင်ခံထားရပြီး အများဆုံး ထောင်ဒဏ် ၅ နှစ်မှ ဆယ်နှစ်အထိ အသီးသီး ချမှတ်ခံရနိုင်သည်။

          တစ်ချိန်တည်းတွင်ပင် KuCoin ၏ အမှုဆောင်အရာရှိချုပ်ဖြစ်သော Johnny Lyu က ကုမ္ပဏီအပေါ်စွဲချက်များသည် လျင်မြန်စွာပြောင်းလဲနေသော ခရစ်တိုကဏ္ဍတွင် တိုးတက်မှုနှင့် စည်းမျဉ်းစည်းကမ်းများ လိုက်လျောညီထွေဖြစ်မှုနှင့်ဆက်နွယ်သည့် ကျယ်ပြန့်သော၊ လုပ်ငန်းခွင်ဆိုင်ရာ စိန်ခေါ်မှုများ၏ တစ်စိတ်တစ်ပိုင်းဖြစ်ကြောင်း X (ယခင် Twitter) တွင် ပြောဆိုတုံ့ပြန်ထားသည်။

“Bill Toulas” ၏ “KuCoin charged with AML violations that let cybercriminals launder billions” ကို ဘာသာပြန်ဆိုသည်။